د.بدران يجيب على سؤال لماذا ترفض الحكومة قبول استقالة موظفيها ؟

كتب الدكتور أمجد بدران :

الوظيفة العامة ليست: "التطور الكلاسيكي للاستعباااااد"!!!...

يصرخ عضو مجلس شعب:

لماذا ترفض الحكومة استقالة موظف؟!

واجيبه:

طيب صديقي انتو المشرعين شرفوا بكل احترام عدلوا القوانين التي لم تعد منطقية واللي صرلها عشرات السنين... ليش عم تلوم الحكومة!!

مهندس درجة أولى أو عامل درجة خامسة بدو يقدم استقالة وفيه ألف مهندس من نفس اختصاصه وعشرة آلاف عامل مو موظف عم يشحدوا فرنكات الوظيفة وبيتمنوا يتوظفوا...

فليش تمنعوا اللي بدو يستقيل؟!

عقوبات حبس سنين وغرامة مرهقة لمن يترك العمل!!! وبالله لاحدا يقلي العمل نوعي لهيك ماعم يوافقو!!!!

معظم حالات عدم الموافقة هي لأعمال غير نوعية بالمرة بل أقل من عادية بل هي بطالة مقنعة وكثير منها نكاية وتشفي من مدراء ووزراء وإساءة سلطة يعني رغبة بتعطيل حياة العالم وإثبات سطوة.... وليست حرص على سير عمل مؤسسة كما يتم الادعاء...

والعقوبات مجحفة وعادة يشملها العفو والقضاة كما أسمع يساعدون بتأجيلها ريثما يشملها عفو وبرافو عالقضاة إن فعلوا ذلك وتصرف صح وصح تنشمل بالعفو لأنها ظلم وتم تجييره من البعض كحق غير مشروع باستغلال اسم الدولة في 99% من الحالات بحجز أبناءها يعني مجرد بتعمل خضة بدن للموظف وقلق ورعب لأسرته وهدر وقت قضاء مو أكتر!!...

كفى تمسكون أولادكم بقسوة بطريقة تجعلهم يرغبون فقط وفقط وفقط بالهرب منكم...

مسك الناس بهذه الطريقة المقرفة هو سبب الهرب الأول... و تقريبا ماحدا فيه يمنع حدا يهرب فاتركوا ابنكم:

يطلع من الباب ويتذكركم بالخير... بدل مابطلع بالليل من الشباك ويسبكم!!!

كرهتوا العالم فيكم...

الوظيفة العامة ليست: "التطور الكلاسيكي للاستعباااااد"!!!... بل يفترض بها عقد... وصحيح أن الدولة في علاقاتها مع الأفراد تملك حق عدم المساواة وهذا منطقي إلا أنه لايعني:

لانهائية اللامساواة!!! ولا يعني:

الأذى والتشفي وتعطيل مستقبل وحسد من مدير أو وزير بل يعني: ضمان حسن سير عمل الدولة أو الإدارة العامة في خدمة المواطنين لا أكثر... ولا يعني شخصنة أو تعسف أبله!!

مدير أو وزير بيكون كرهان سماه للموظف وماعم يكلفه بأي عمل ومهمشه وبس الموظف بدو يستقيل بصير:

حبيب قلبو ومافيه يعيش بلاه!!!! وبيصير اختصاصه نادر ومهم!!! في حين يكون حقد وسادية المدير أو الوزير وعقدة النقص عنده هو: النادر وصعب يلتقى!!

هل صار فقه القانون ضعيف الحيلة لهذه الدرجة!!...

أطالب مجلس الدولة وقضاته الكبار بوضع حد وبالقانون لما يحدث... وهذا ليس صعب... بل ويحبب الناس بالدولة...

معظم ولادنا عم ينطوا من الشباك أو فوق السور!!!! مابيصير هيك...