ابتزاز بيّاع فول ينقذ المواطن المذلول

عبير سمير محمود

الناس كالعادة متجمعين عموقف #كيدون (الجامع الأزرق) ناطرين فرج سرافيس ضاحية الإسكان أو بسنادا وعاليسار سرافيس الطابيات والمشفى

الوجوه غير انها تعبانة #قرفانة ورغم هيك بيوقف بيّاع فول بيبلش ينادي ليسترزق، ويضيّف الرايح والجاي، ومنهم سائقي سرافيس بيرفعوا ايدهم (أكيد بتعرفوها هي الحركة تبع مو طالع رايح عبّي مازوت ) بينما بيمدوها لياخدوا كمشة فول مجانية ويتسلوا فيها بعد ما تسلوا بذل الناس عالمواقف..

المهم هون بيخترق المشهد "عمو الشرطي" متل ما بيقلولوا الاولاد، بيبلش يبتز بيّاع الفول وويهددو وهو عم يضحك باستفزاز أنه رح يحجزلو السيارة.. فهم عليه البياع وطلع قدو .. قلو بعرف فلان زميلك بالسلك.. ضحك المروري مو مصدقه للبياع وبلش يفصفص بهالفولات بنظرة تهديد لطيفة، كان البياع عطاه الموبايل قلو الفلان اللي حكيتلك عنو حابب يسلم عليك، غصّ الشرطي واخد الموبايل ومشي عجنب والجماهير عالموقف صارت تنتظر لحظة رجوعه يا ترى شو حيصير .. وإذ بيرجع عم يكمل ضحك ويقول لزميله عالهاتف: "لا عم نمزح لندوق الفولات".. طبعا البياع حطلو كيس فيه 2 كيلو وبعتلو ياهن عالرصيف التاني بإشارة من الشرطي بتعرفوا مشان ما تبين هدية علنية أعوذ بالله ..

بين ما خلص هالمشهد كانت سيدة عم تقلي: لك أختي ليش هالسرافيس ما عم توقّف.. قلتلا وأنا عم قرّب من الشرطي.. لأن ما في مين يسترجي يخالفهن متل ما عم يتشاطر على بياع الفول.. انبرى وبدو يعلي صوتو.. قلتلو شفنا شو صار وما فيه حدا يتدخل بعملكن بخدمة الشعب أكيد.. بس الحمدلله طلع من خرجك هالزلمي مابدو مين يخدمو.. رجع يضحك ويكمل عالفولات.. قلي لك هون ما بعرف موقف شو.. في باص بلدية؟ .. قلتلو لكن انت ليش واقف هون وعم تصفّر رايح جاي .. قال مشان السيارات اللي بيجوا من خارج المدينة.. سألتو يعني مو مشان تراقب عمل الخطوط وتنظّم السير ومو شايف قدامك كيف السرافيس عم يمروا فاضيين ما عم يطالعوا حدا.. قال ما حدا قدملي شكوى.. قلتلو ليش انت مو شايف شو عم يصير أو بس شايف الفول وعم تبتز الزلمي بينما الشوفيرية اللي ايديهن ممدودة الكن مدري شو فيها الله أعلم حتى وقت كورونا بتتصافحوا وبتغضوا بصر عنها.. قلي لا ياأختي انا هون بخدمتن بس يشتكو.. يكتبولي رقم اي سرفيس وشوفوا كيف منضبطه.. (كل الواقفين رغم اليأس ضحكوا من قلوبن مع هزة راس فيكن تتخيلوها )..

وبعد هالمصارحة.. وندرة السرافيس.. شرّف أول سرفيس على خط الضاحية وصفرلو عمّكن الشرطي ووقفو بأرضه قلو ليش ما عم توقف للناس يالله ( لبين ما اتعود اكتبها "يلا") اطلعوا .. وتاني سرفيس عالطابيات وواحد وحيد عبسنادا ومتلو عالضاحية وهيك لحتى طلعت كل الناس مكدوس نظامي وانا عم اتفرج قلتلو شفت كيف بس تشتغلو مهماتكن بشكل صحيح ما بيضل في أزمة.. منعرف أنو راتبكن ما بيكفي ويمكن في أساليب تانية بتسدوا النقص منها بس عالقليلة اشتغلوا مقابل اللي عم تستفيدوه ما حدا بيزعل ..

وبعد وقت منيح.. بنفس الضحكة وكمشة فول جديدة بيقلي وهو عم يوقف سرفيس الفرج لآخر دفعة من المنتظرين يالله "يلا" اطلعي معن حاجتك عاملة راقوب ..

العبرة مو بالتشهير.. بس لو كل حدا بيحكي ليشتغل "الموظف" نص شغله صح.. منكون بخير..

#الصورة_بعلم_الجميع .. والشرطي

#عينك_قلمك

قصة ليست قصيرة.. عذراً عالإطالة

من صفحة الزميلة عبير سمير محمود