سمعتوا مؤخراً عن انتشاري بيناتكن أنا الكوليرا فمين أنا ؟
أنا عبارة عن جرثومة اسمي الكوليرا بنتقل الكم وقت بتشربوا مي ملوثة فيي ، أكل ملوث فيي عن طريق الذباب الطائر ومن أيدين واحد حاملني مصاب فيي مو منضف أيديه منيح
يلي بعملو بالمصاب فيي فجأة إسهال قوي وشديد جداً بطريقة مو معقولة وبيجي بعدها استفراغ يعني من فوق ومن تحت وكل بدون ألم أو مغص ها !
بيفتكر حالو المسكين موتّب أو آخد برد أو تشويبة وبعد ما بكون فضّى أمعاءه كلها بيطلع يلي بدل عليي إسهال فيه مي بتشبه مي الرز ( مي مع مخاط ) ولهون الحكي عندكم عادي بس يلي مو عادي أنو هالإسهال والإقياء بخسركم سوائل وشوارد ومغذيات بطريقة مرعبة بتوصل المريض فيي للصدمة يعني بيتجفف عالآخر .
التشخيص بأنو يشوفوني الدكاترة بالبراز أو حتى بمسحة من المستقيم والنقطة المهمة هون أنو بس شفتوا كوليرا ولولوا واصرعوا الدنيا
لازم الكل يعرف مو ليخاف مني لاء .. الخوف ما بجيب نتيجة بس لازم فوراً الدولة يلي بنتشر فيها تتحرك لتعقم أنابيب المي ولازم تبعدوا عن أكل السوق وتلتزموا إجراءات النظافة الشخصية الصارمة .
الفكرة مو بالمصاب يلي مبين عليه أعراض !
بل بالمصاب غير العرضي يعني النهر الهادي وبما أني أنا بنتقل من خلال براز أو قياء المصاب فضروري كتير ما تسلموا على حدا بدون ما تنضفوا ايديكم ولا تطلعوا من حمام قبل ما تغسلوا منيح ولا تبلشوا أكل قبل ما تعقموا منيح وتبعدوا هالفترة عن أكل السوق والأكل المكشوف وتبعدوا عن المسابح كمان لأنو ممكن عيش بالمي المالحة حوالي الشهرين !
وكمان بدي توعوا ولادكن بما أنو هلق في مدارس والطفل كتير بدو انتباه وهوي أكتر حدا بينقل المرض ومعلش تنتبهوا كمان اذا شاكين بالمي اغلوها أو اشتروا شي معلب
المرض بيتعالج ها بكم دوا بس أنو بخوف لأنو بيعدي بسرعة مو أكتر فبدو وعي أكتر من الخوف
د. سماح صالح محمد
المصدر:
دافيدسون الطبي البريطاني .
