وجوه يُخيم عليها الوجوم، وعيون تُخالطها الدموع، حُزنًا على رحيل “سند العيلة”.. هكذا رصدت عدسة “مصراوي” حال أسرة المجني عليه “جمال سامي عطا” بقرية “أنشاص البصل” التابعة لمركز الزقازيق، بمحافظة الشرقية، الذي تعرّض لسطو من قِبل ثلاثة أشخاص حرقوه داخل سيارته. “كان بيحارب علشان يحمي ماله وعربيته”.. قالت هذا “فاتن صابر” زوجة المجني عليه لـ”مصراوي” قبل أن تدخل في نوبة بكاء، وهي تتذكر آخر مكالمة هاتفية بينهما: “قال لي جايب عشا للولاد وصحيهم وكمان صحي أمي علشان نتعشى كلنا سوا”. وأضافت: “بعدها بشوية لقينا واحد بيتصل بينا علشان يقول لنا إن جمال نقلوه المستشفى بعد ما طلعوا عليه جماعة بلطجية وحرقوه.. جرينا على المستشفى، وهناك عرفنا أن أحمد السواق هو اللي ورا المصيبة دي، وإنه انتقم من جوزي بعد ما طرده من المصنع”. والتقط “صلاح”، 24 سنة، شقيق المجني عليه، أطراف الحديث ليروي تفاصيل أسباب انتقام القاتل: “كان شغال سواق في المصنع بتاع جمال، وأخويا طرده من شهرين”. وتابع: “أحمد كان عمل حادثة بعربية المصنع قبل كده، وأخويا وقتها مرضيش يخصم له، وقال غصب عنه، لكنه بعدها عمل حادثة تانية، وجمال خصم له علشان ميكررهاش، إنما الخصم لم يعجب أحمد وشد مع أخويا لغاية ما طرده من المصنع”. ومع انتهاء “صلاح” من حديثه تدخل والده وهو يُكفكف دموعه قبل أن يروي تفاصيل الحادث: “ابني كان بيوصل شغل لواحد في مدينة السلام، وكان راجع معاه 38 ألف جنيه، وفي الطريق أوقفه أحمد هو وإخوته وكانوا ملثمين وعاوزين يسرقوه”. “جمال حاول يقاومهم ويدافع عن نفسه لكن الكترة تغلب الشجاعة”، أضاف الأب: “ابني كشف وش واحد فيهم وعرف إنه أحمد اللي كان سواق عنده، وبعدها من جبروتهم ولّعوا فيه وهربوا”.