بداية القابضة

رئيس التحرير : عبد الفتاح العوض

رئيس مجلس الإدارة : د. صباح هاشم

من نحن اتصل بنا
أجنحة الشام

تولين البكري كما ترى نفسها

السبت 05-06-2021 - نشر 3 اسابيع - 2165 قراءة

أسمي : حياة من وقت ماجيت عالدنية .. تولين مو أسم فني لا أبدآ ..وقت صار عمري شي 8 سنين اهلي غيرولي اسمي من حياة ل تولين مابعرف ليش متل كتير شغلات مامنختارها .

سورية/ نصي شامي ونصب التاني حموي /والدي من دمشق /صالحية ..و والدتي من حماه . بس مابعرف ليش بيفكروني حلبية.

برجي: العقرب مواليد 25/اكتوبر... بس سبيعية... جابتني ماما بالشهر السابع كان وزني بيقولو بوقتا كيلو واحد.. وعشت بأعجوبة / طالعي الجوزاء / برجي الصيني : التنين .

موووودية/ مزااااجية لدرجة مزعجة . فجأة بيتغير مودي من الجيد للسيء والعكس صحيح.

أم: ل 3 اولاد شب وصبيتين/كانوا 4 اولاد لكن ابني كريم توفاه الله بعمر الشهرين .. وهلأ عندي طلال وجودي ولولوة. الله يحميلكم أولادكم.

هواياتي: الفن بكل أشكاله / السباحة/ ركوب الخيل / المطالعة/ السفر/المغامرة/اكتشاف كل ماهو جديد./اعشق الموسيقا/والتعبير بالكتابة.

احلامي : بسيطة جدا . بيت صغير ..سيارة...وشوية امان.

بيقولو الإنسان بيتغير كل 7 سنين وعن تجربة بقول فعلآ. مثلآ انا كنت حب المشاوير والطلعات والاختلاط.. ومن 3 سنين تقريبا صارت متعتي التصوف بكل معنى الكلمة...بحب وحدتي وبستمتع فيها واجمل مكان عندي هو الرجوع للمنزل .

عدوي : الكذب/ التملق/

بحب الكل وبسامح لكن لا أنسا لا القبيحة ولا المنيحة... بتذكر ال2 لو بعد 1000 سنة.

ما بآمن بالاقوال شعاري الأفعال.

بيقولو عني طيبة ولكن مو ساذجة/ بس كريمة لدرجة الهبل. 😊بمعنى اللي بجيبتي مو إلي.

ديانتي: الفعلية مسلمة والحمدلله.. وبروح عالكنيسة دايما يشعل شمعة لأني بعشق يسوع ومريم ..وكل الأنبياء والرسل وبحترم كل الأديان والطوائف.. بحترم المسلم والمسيحي واليهودي والبوزي وكل من لديه إيمان بشيء.


أخبار ذات صلة